to view this page in Khmer or need to កិច្ចប្រឹងប្រែងសុំឲ្យដោះលែង ដាំ សិទ្ធិ ឈានដល់ថ្ងៃទី៦ហើយ
0 Commentsកិច្ចប្រឹងប្រែងសុំឲ្យដោះលែង ដាំ សិទ្ធិ ឈានដល់ថ្ងៃទី៦ហើយ
វិទ្យុអាស៊ីសេរី
ដោយ ច័ន្ទថុនា
2008-06-12
កិច្ចប្រឹងប្រែងលើសេចក្តីស្នើសុំដោះលែងឲ្យនៅក្រៅឃុំចំពោះនិពន្ធនាយកកាសែតមនសិការខ្មែរ លោក ដាំ សិទ្ធិ បានឈានដល់ថ្ងៃទី៦ហើយ គិតមកទល់នឹងថ្ងៃព្រហស្បតិ៍នេះ ។
ការចាប់លោក ដាំ សិទ្ធិ ដែលជាបេក្ខជនអ្នកតំណាងរាស្ត្រគណបក្សសមរង្ស៊ីដាក់គុកនៅមុនការរៀបចំបោះឆ្នោតសកលខែកក្កដា ឆ្នាំ២០០៨ បានញ៉ាំងឲ្យមានប្រតិកម្មយ៉ាងខ្លាំងក្លាពីមជ្ឈដ្ឋានអ្នកការទូត និងអង្គការអន្តរជាតិ ។
ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក Joseph Mussomeli បានមានប្រសាសន៍សង្ឃឹមថា បេក្ខជនតំណាងរាស្រ្តគណបក្សសមរង្ស៊ី លោក ដាំ សិទ្ធិ នឹងត្រូវអាជ្ញាធរដោះលែងនាពេលឆាប់ៗនេះ ។
លោកឯកអគ្គរដ្ឋទូតអាមេរិកបានថ្លែងថា វាជាសញ្ញាមិនល្អទេដែលមានការចាប់ខ្លួនលោក ដាំ សិទ្ធិ ដែលជានិពន្ធនាយកកាសែតមនសិការខ្មែរនៅក្នុងពេលនេះ ។
ប្រតិកម្មរបស់លោកឯកអគ្គរដ្ឋទូត Joseph Mussomeli បានធ្វើឡើងស្របនឹងស្ថានការណ៍ដែលមានការរិះគន់ពីមតិជាតិនិងអន្តរជាតិ ដែលចោទថាការចាប់ខ្លួនលោក ដាំ សិទ្ធិ គឺជាអំពើខុសច្បាប់ ហើយកាន់តែនាំឲ្យគេមើលឃើញភាពមិនប្រក្រតីនៃដំណើរការរៀបចំការបោះឆ្នោតតាមគន្លងលទ្ធិប្រជាធិបតេយ្យ ។
លោក Joseph Mussomeli បានមានប្រសាសន៍ថា ៖ "យើងមានការបារម្ភខ្លាំងណាស់ អំពើណាមួយដែលធ្វើឲ្យខូចមុខមាត់របស់កម្ពុជា ។ យើងតែងតែបារម្ភ យើងមិនចង់ឲ្យកម្ពុជាត្រូវគេមើលឃើញថា ជាប្រទេសដែលមានការបំភិតបំភ័យ មានការបង្ក្រាបក្នុងរូបភាពណាមួយនោះទេ ។ យើងមានការចាប់អារម្មណ៍ចំពោះរដ្ឋមន្ត្រីក្រសួងព័ត៌មានដែលបានអំពាវនាវឲ្យមានការដោះលែងលោកនិពន្ធនាយក ដែលនេះគឺជាសញ្ញាល្អបង្ហាញថា នៅក្នុងជួររាជរដ្ឋាភិបាលមានអ្នកដឹងថា ទង្វើបែបនេះជាទង្វើមិនសមស្របទេ ។ យើងរំពឹងចង់ឃើញការដោះលែងនិពន្ធនាយក ហើយយើងមានសុទិដ្ឋិនិយម" ។
មេធាវីការពារក្តីលោក ដាំ សិទ្ធិ ឈ្មោះលោក ជូង ជូងី បានថ្លែងថាលោកកំពុងតែធ្វើការតវ៉ាបង្ហាញថា ការចាប់ខ្លួនលោក ដាំ សិទ្ធិ គឺជាអំពើខុសច្បាប់ ៖ «តុលាការចាត់ការហ្នឹងខុសទាំងស្រុង ។ ហើយទន្ទឹមនឹងនេះគឺមានអន្តរាគមន៍ពីក្រសួងព័ត៌មាន ហើយមានអន្តរាគមន៍ពីទាំងសមាគម ទាំងសហគមន៍អន្តរជាតិ អន្តរាគមន៍គ្រប់ច្រកល្ហកទាំងអស់ ពីព្រោះមជ្ឈដ្ឋានទាំងនោះមើលឃើញថា តុលាការធ្វើខុសច្បាប់អ៊ីចឹងមែន ។ (ខុសច្បាប់យ៉ាងម៉េចទៅ ?) ពីព្រោះទី១ ខ្ញុំជាមេធាវីគឺខ្ញុំមានជំនឿថា កូនក្ដីខ្ញុំគាត់អត់មានខុសទេក្នុងការផ្សាយព័ត៌មានហ្នឹង ។ ហើយក្នុងការដែលគាត់សម្រេចឃុំហ្នឹង គឺមានចំណុចជាច្រើនដែលខុសនឹងមាត្រាច្បាប់ចែងហ្នឹងណា៎ ។ ដូចជាទី១ គឺទម្រង់ដែលគាត់ប្រើក្នុងការសម្រេចឃុំខ្លួនកូនក្ដីខ្ញុំហ្នឹង អត់មានអត្តសញ្ញាណកូនក្ដីខ្ញុំនៅក្នុងដីកាសម្រេចឃុំខ្លួនហ្នឹងទេ ហើយគាត់បញ្ជូនកូនក្ដីខ្ញុំទៅពន្ធនាគារតែម្ដង ។ ហើយទី២ មាត្រា២០៤នៃក្រមនីតិវិធីព្រហ្មទណ្ឌ គឺអាចឃុំខ្លួនបណ្ដោះអាសន្នបាន លុះត្រាតែការផ្តន្ទាទោសនោះគឺពី១ឆ្នាំឡើង ប៉ុន្តែតុលាការយកមាត្រាទី៦២ នៃច្បាប់ព្រហ្មទណ្ឌអន្តរកាលមកហ្នឹង គឺមាត្រា៦២ហ្នឹង គឺផ្តន្ទាទោសពី៦ខែទៅ វាខ្ទាស់ទៅនឹងមាត្រា២០៤នៃក្រមនីតិវិធីហ្នឹងណា៎» ។
លោក ដាំ សិទ្ធិ ដែលជាបេក្ខជនឈរឈ្មោះតំណាងរាស្ត្រឲ្យគណបក្សសមរង្ស៊ីនៅមណ្ឌលភ្នំពេញ ត្រូវគេចោទប្រកាន់ពីបទផ្សាយព័ត៌មានមិនពិត និងបរិហារកេរ្តិ៍ ជុំវិញការផ្សាយព័ត៌មានដែលសរសេរថា លោកឧបនាយករដ្ឋមន្ត្រី ហោ ណាំហុង គឺជាអតីតប្រធានគុកបឹងត្របែកជំនាន់របបខ្មែរក្រហម ។ ការសរសេរផ្សាយរបស់លោក ដាំ សិទ្ធិ ដែលមានតាំងពីខែមេសាកន្លងមក គឺបានដកស្រង់តាមប្រសាសន៍របស់ប្រធានគណបក្សប្រឆាំង លោក សម រង្ស៊ី ។
កាលពីម្សិលម៉្ងៃ លោក សម រង្ស៊ី ក្នុងសន្និសីទកាសែតបានថ្លែងថា ការចាប់លោក ដាំ សិទ្ធិ គឺជាអំពើមិនត្រឹមត្រូវ ហើយលោកជំរុញឲ្យអាជ្ញាធរធ្វើការដោះលែងលោក ដាំ សិទ្ធិ នោះវិញ ។
ឯកអគ្គរដ្ឋទូតសហរដ្ឋអាមេរិក លោក Joseph Mussomeli បានថ្លែងថាលោកសង្ឃឹមថា លោក ដាំ សិទ្ធិ នឹងត្រូវគេដោះលែងនាពេលខាងមុខនេះ ៖ "យើងកំពុងពិភាក្សាបញ្ហានេះជាមួយនឹងរាជរដ្ឋាភិបាល ។ យើងជឿថាបញ្ហានេះគួរតែដោះស្រាយក្នុងរបៀបធម្មតា ហើយយើងនឹងសង្ឃឹមថា នឹងអាចចេញទៅរួច" ។
លោក ដាំ សិទ្ធិ ទើបត្រូវគេអនុញ្ញាតកាលពីម្សិលមិញឲ្យបានជួបប្រធានគណបក្សប្រឆាំង សម រង្ស៊ី ។
មេធាវីការពារក្តីរបស់លោក ដាំ សិទ្ធិ បានថ្លែងថាកាលពីថ្ងៃអង្គារ លោក ដាំ សិទ្ធិ មិនត្រូវគេអនុញ្ញាតឲ្យជួបជាមួយភរិយានោះឡើយ ប៉ុន្តែមិនហ៊ានប្រឆាំងនឹងការស្នើរបស់ប្រធានគណបក្សប្រឆាំង លោក សម រង្ស៊ី ដែលបានស្នើជួបកាលពីម្សិលមិញនោះទេ ។
មន្ត្រីគណបក្សសមរង្ស៊ីបានថ្លែងថា គេរំពឹងថាតាមរយៈការជួយជ្រោមជ្រែងពីអ្នកការទូតនិងប្រតិកម្មពីអន្តរជាតិផង លោក ដាំ សិទ្ធិ នឹងត្រូវគេដោះលែងនាពេលឆាប់ៗនេះ ៕
0 Comments:
Post a Comment
<< ទំព័រដើមវិញ